TesTlaR.Ucoz.Com

Обама Путин билан учрашув бекор қилиниши сабабини тушунтириб берди

HH — Wed, 14 Aug 2013 15:28:33 GMT

Расмий Вашингтоннинг сентябрь ойига белгиланган Барак Обама ва Владимир Путин ўртасидаги учрашувни бекор қилишига нафақат Россия томонидан Эдвард Сноуденга бошпана берилгани, балки бошқа бир қатор сабаблар туфайли ҳам бекор қилинган. Бу ҳақда, Associated Press хабарига кўра, 9 август куни оқшомда ўтказилган матбуот анжуманида АҚШ президенти Барак Обама маълум қилган.

Обаманинг сўзларига кўра, сўнгги ойларда икки томонлама муносабатлардаги муҳим масалалар юзасидан, хусусан, Суриядаги вазиятни тартибга солиш ва инсон ҳуқуқларига риоя этиш бўйича «ўсиб келаётган қарама-қаршиликлар» очиқ кўриниб қолган.

Обаманинг қайд этишича, Дмитрий Медведев президентлиги вақтида икки мамлакат ўртасида ривожланишга эришилганди, Кремлга Владимир Путиннинг қайтиши билан Россияда Америкага қарши кайфият кучайган. Айни вақтда, Reuters’нинг қайд этишича, АҚШ президенти Путин билан «шахсий муносабатлари ёмон» деган фикрга бормаслик кераклигини таъкидлаб ўтди. Обама, шунингдек, Россия президентини АҚШ билан муносабатлар масаласида «ўтмишга эмас, келажакка қараш»га чақирган.

Эдвард Сноуден билан боғлиқ ҳолатга тўхталар экан, Обама МРБ собиқ ходимини ватанпарвар деб ҳисоблай олмаслигини айтган. Президентнинг фикрича, агар Сноуден ҳақиқатан ҳам ўз ҳаракатлари тўғри бўлган деб ҳисобласа, АҚШга қайтиши ва ўз нуқтаи назарини судда ҳимоя қилиши керак. Шу билан бирга, Обама АҚШ ҳукумати яқин вақт ичида махфий кузатув дастурлари ҳақидаги янги маълумотларни эълон қилишини, бу билан жамиятдаги хавотирларни бартараф этиш мақсадида эканлигини ҳам айтиб ўтди.

Матбуот анжумани давомида Обама бир қатор ҳуқуқ ҳимоячилар ва америкалик сенаторларнинг Россияда қабул қилинган ноанъанавий жинсий алоқаларни тарғиб қилишга қарши қаратилган қонунни деб Сочи Олимпиадасини бойкот қилиш ҳақидаги чақириқларини қўллаб-қувватламаслигини билдирди. У, шунингдек, америкалик гомосексуал-атлетлар ўз ватанларига медаллар шодаси билан қайтишларига умид билдирди. «Агар Россия термасида гомосексуал спортчилар йўқ бўлса, бу, эҳтимол, уларни кучсизлантиради», – дея фикр билдирди АҚШ президенти.

Обама ва Путин ўртасидаги учрашув сентябрда, Санкт-Петербургдаги G-20 саммити арафасида Москвада бўлиб ўтиши керак эди. Америкалик президент Москвага сафардан воз кечгани 7 август куни маълум бўлганди. Шу билан бирга, Обама маъмурияти президент, аввал режалаштирилганидек, Санкт-Петербургдаги G-20 саммитига боришини қайд этиб ўтганди.

Суриядаги авиазарбалар натижасида 30 киши ҳалок бўлди

HH — Wed, 14 Aug 2013 15:26:02 GMT

Суриянинг Латакия вилояти ва мамлакат шимолидаги Ракка шаҳрига ҳукумат кучлари томонидан 10 август, шанба куни уюштирилган авиаҳужумлар натижасида 30дан ортиқ киши ҳалок бўлди. Agence France-Presse’нинг Syrian Observatory for Human Rights ҳуқуқ ҳимоячилари гуруҳи маълумотларига асосланиб хабар тарқатишича, ҳалок бўлганлар орасида камида етти нафар бола бор.

Раккада авиаҳужумлар натижасида камида 13 нафар тинч аҳоли вакили ҳалок бўлган. Латакияда эса 20 киши ҳалок бўлган бўлиб, улардан камида олти нафари суриялик исёнчилар ва яна тўрт нафари – исёнчиларга ёрдам бераётган хорижликлар бўлган.

Ҳуқуқ ҳимоячиларининг фикрича, ҳужумлар Ракканинг катта қисмини назорат қилиб турган «Ироқ ва Левант ислом давлати» диний гуруҳига қарши йўналтирилган бўлган – ушбу вилоят исёнчилар қўл остида қолаётган Суриянинг ягона вилоятидир.

AFP’нинг қайд этишича, Ракка шаҳри диний ақидапарастлар томонидан ишғол этилганидан сўнг, шаҳарда уларнинг сиёсатига қарши бир неча намойишлар бўлиб ўтган. Август бошида исёнчилар билан музокаралар ўтказиш мақсадида Раккага келган италиялик иезуит-руҳоний ўғирлаб кетилганди.

Исёнчилар, шунингдек, аҳолиси асосан алавийлардан иборат ва Башар Асад режимининг асоси бўлган Латакия вилоятининг бир қисмини ҳам эгаллаб олишган. Вилоятда муросасиз жанглар давом этмоқда ва ҳукумат кучлари исёнчилар томонидан эгалланган аҳоли пунктларини озод қилишга интилмоқда.

Суриядаги фуқаролар уруши 2011 йил мартидан бери давом этмоқда. Ўтган давр мобайнида низо натижасида 100 мингдан ортиқ киши ҳалок бўлди.

Бағдоддаги кетма-кет портлашлар натижасида 50 киши ҳалок бўлди

HH — Tue, 13 Aug 2013 12:48:11 GMT

Ироқ пойтахти Бағдод шаҳрида содир бўлган кетма-кет портлашлар натижасида камида 50 киши ҳалок бўлган, 140 киши турли даражада тан жароҳати олган. Бу ҳақда Reuters ахборот агентлиги хабар бермоқда.

Шаҳар бўйлаб жами тўққизта портлаш содир этилган бўлиб, улар Бағдоднинг асосан мусулмон-шиялар истиқомат қиладиган туманларидаги кўча ва бозорларда юз берган. Дастлабки маълумотларга кўра, барча портловчи моддалар машиналарга ўрнатилган бўлган.

Ироқдаги террорчилик гуруҳларидан бирортаси ушбу портлашларга алоқадорлиги тўғрисидаги хабарлар ҳозирча келиб тушгани йўқ. Полиция маълумотларига кўра, терактлар Бағдодда 6 август куни юз берган портлашлар каби режалаштирилган ва мувофиқлаштирилган – ўшанда ҳам 50 киши ҳалок бўлганди.

Портлашлар мусулмонлар учун муқаддас ҳисобланган ва 2013 йилнинг 8-9 августига тўғри келган Рамазон ойи якунига бағишланган байрам тантаналари вақтида содир этилган. Мусулмон мамлакатлари анъаналарига кўра, байрам одатда бир неча кун давом этади.

Шанба куни, шунингдек, Ироқнинг Туз Ҳурмату шаҳрида ҳам портлаш содир этилган. У ерда ўз жонига қасд қилган террорчи миналаштирилган машинани портлатиб юборган. Портлаш натижасида 10 киши ҳалок бўлган, 45 киши турли даражада тан жароҳати олган.

Agence France-Presse маълумотларига кўра, Рамазон ойи давомида Ироқда содир этилган портлашлар натижасида 800дан ортиқ киши ҳалок бўлган.

Евронинг расмий курси 2,8 минг сўмдан ошди

HH — Tue, 13 Aug 2013 12:33:12 GMT

Ўзбекистон Марказий банки хорижий валюталарнинг сўмга нисбатан янги қийматларини эълон қилди. Бу ҳақда молия муассасаси сайтида ахборот берилган.

Ўзбекистон Республикаси Марказий банки 2013 йил 13 августдан бошлаб валюта операциялари бўйича бухгалтерия ҳисоби, статистик ва бошқа ҳисоботларни юритиш, шунингдек, божхона ва бошқа мажбурий тўловлари учун хорижий валюталарнинг сўмга нисбатан янги қийматларини белгилади.

Унга кўра, 1 АҚШ доллари 2 минг 115 сўм 36 тийин қилиб белгиланган. 6 августдаги курс (2 минг 111 сўм 45 тийин) билан таққослаганда, 1 АҚШ доллари 3 сўм 91 тийин (ёки 0,18 фоизга), 2013 йил 1 январдаги ҳолат (1 минг 985 сўм 46 тийин) билан таққослаганда, 129 сўм 90 тийинга қимматлаган.

Эътиборли томони, 1 Евро биринчи марта 2,8 минг сўмлик кўрсаткичдан ўтди. Бир ҳафта аввал 2 минг 799 сўм 25 тийиндан баҳоланган Евро баҳоси 12 сўм 2 тийинга ошиб, 2 минг 811 сўм 27 тийинни ташкил этди. Бу 2013 йилнинг 1 январидаги кўрсаткичдан 185 сўм 34 тийинга қимматроқ. Аввалроқ, анироғи, февраль ойида 1 АҚШ доллари 2 минг сўмлик кўрсаткичдан ўтган эди.

Валюта қийматини белгилаш чоғида Ўзбекистон Республикаси Марказий банки хорижий валюталарни ўзи белгилаган қийматда сотиш ва сотиб олиш мажбуриятини олмаган.

Қўшимча сифатида, Ўзбекистон Президенти Вазирлар Маҳкамасининг 2012 йил якунлари ва 2013 йил режаларига бағишланган мажлисида ўтган йил «инфляция даражасининг ўсиш суръати прогноз кўрсаткичлари доирасида сақлаб қолиниб, 7 фоиздан ошмагани»ни, 2013 йилда ҳам ушбу кўрсаткич 7-9 фоизни ташкил этиши кутилаётганини маълум қилганди.

Avstraliyaga yo'l olgan qochoqlar kemasi cho'kib ketdi

HH — Sun, 28 Jul 2013 14:25:30 GMT

Avstraliyaga suzib ketayotgani taxmin qilingan qochoqlar kemasi Yava oroli sohilida cho'kib ketdi. Avstraliyada chop etiladigan The Sydney Morning Herald gazetasining yozishicha, kemada Iroq, Eron, Shri-Lanka va Afg'onistondan bo'lgan 200 nafarcha kishi bo'lgan. Voqea joyiga etib kelgan baliqchilar va Indoneziya qutqaruv xizmati xodimlari suvdan 157 kishini chiqarib olishgan. Kamida uch kishining qurbon bo'lgani tasdiqlandi. Ularning biri yoshgina qizbola edi. Qolganlar esa bedarak ketgan deb baholanmoqda. Avstraliyalik qutqaruvchilar yo'qolganlarni topish ishlarida Indoneziyaga yordam berishni taklif qilishdi. Lekin hozircha ikkinchi tomondan javob bo'lmadi.

Samsung Electronics zavodiga o't ketdi

HH — Sun, 28 Jul 2013 14:23:53 GMT

Bugun elektronika ishlab chiqaruvchi etakchi Janubiy Koreyaning Samsung Electronics kompaniyasida yong'in sodir bo'ldi. Yong'in Seuldan 40 kilometr uzoqlikda joylashgan zavodning ishlab chiqarish liniyalaridan birida mahalliy vaqt bilan 12.36 yuz berdi. Yong'inni o'chirishda 15 nafar o't o'chirish brigadalari safarbar qilindi. Yuzaga kelgan alangani o'chirishga 30 daqiqa vaqt sarflandi. Hozirda jabrlanganlar xaqida aniq ma'lumot yo'q, yong'inning sababi va qancha zarar keltirganligi xaqidagi ma'lumotlar aniqlanyapti. Samsung Electronics dunyodagi eng yirik ishlab chiqaruvchilardan biri hisoblanadi. Kompaniya 2013 yilning ilk choragida smartfonlar savdosi bo'yicha dunyodagi eng peshqadam bo'ldi.

Britaniya Qirollik oilasining chaqalog'i ommaga namoyish etildi

HH — Sun, 28 Jul 2013 14:19:58 GMT

Kuni kecha farzandli bo'lgan Britaniya Qirolligi shahzodasi Uilyam va uning rafiqasi Ketrin Middlton butun olamga yangi chaqaloqni ko'rsatishdi. 22 iyul kuni tug'ilgan chaqaloq soppa-sog' ekani aytilmoqda, unga hali ism tanlashgani yo'q. Uilyam jurnalistlarga chaqaloq o'zini yaxshi his etayotgani va anchagina og'ir tug'ilganini aytdi (3,798 kg). Uning aytishicha er-xotinlar hozir unga qanday ism tanlash haqida bosh qotirishmoqda. Sky News agentligining xabar berishicha buguncha chaqaloqqa ism qo'yilmasligi aniq.